Abahatanye mu ihiganwa rya Tangira Start-Up TV Contest bamaze guhabwa amasomo ku bijyanye no guteza imbere imikorere yabo ndetse no guteza imbere impano z’abakozi mu cyiciro gishya cy’inyigisho z’ubujyanama.
Ni inyigisho zikurikira iz’ibanze bari bahawe ku bijyanye n’imibereho myiza igamije gufasha abahatana guhuza imishinga yabo n’ibyifuzo by’abaturage ndetse n’indangagaciro zirambye.
Ayo masomo y’ubujyanama abiri mashya yatangiwe kuri Paramount Hotel, yibanze ku guteza imbere imikorere mu bigo n’ibijyanye no kubakira ubushobozi abakozi no guteza imbere impano zabo.
Muri iki cyiciro gishya cy’ubujyanama abahatana bahawe ubumenyi ngiro buzabafasha gushyira mu bikorwa imishinga yabo neza.
Coach Tadhim Uwizeye, inzobere mu gutegura imishinga y’ubucuruzi no kuyishyira mu bikorwa ari nawe watanze inyigisho ku guteza imbere imikorere mu bigo, yabasangije ubumenyi ku buryo bwo kunoza imirimo yabo ya buri munsi, gucunga neza umutungo no kubaka sisiteme zigamije iterambere rirambye mu bucuruzi.
Yagarutse ku kamaro k’imikorere iteguwe neza agira ati “Imikorere iteguwe neza ni umusingi w’ubucuruzi burambye.”
Abahatana bashishikarijwe gushyiraho uburyo busobanutse, nko gukoresha imibare mu kugenzura imikorere yabo no guhora bafite inyota yo kunoza ibyo bakora.
Uhagarariye Nerica Clean Ltd iri mu mishinga ihatanye, yavuze ko yize byinshi ku bijyanye no gushyiraho iby’ingenzi mu mikorere no guhuza ibikorwa bya buri munsi n’icyerekezo cy’igihe kirekire cy’ikigo.
Habaguhirwa Jean de Dieu watanze ubujyanama ku bijyanye no kubakira ubushobozi abakozi no guteza imbere impano, yabashishikarije kubanza kubaka amatsinda akomeye, gukuza impano no gushyira imbere umuco mwiza wo gukunda umurimo.
Abahatanye bavuze ko ubu basobanukiwe akamaro ko guhitamo abakozi neza, kunoza uburyo bw’itumanaho no kubaka ahantu ho gukorera hatabangamiye abakozi kugira ngo bafashe ikigo gukura kandi vuba.
Nyuma y’izi nyigisho, abahagarariye akanama nkemurampaka bashimye uburyo abahatanye bagaragaje icyizere cyo kunguka ubumenyi, gusobanukirwa no kunoza ingamba mu bucuruzi. Biteganyijwe ko isomo rizakurikira rizibanda ku icungamutungo no gutegura imbanzirizamushinga.
Tangira StartUp TV Contest ishyirwa mu bikorwa na RG-Consult ikaba ifite abafatanyabikorwa batandukanye barimo BRD, ICT Chamber,
Minisiteri y’Ikoranabuhanga na Inovasiyo, RSE, StartUp 250, BPN, ESP, IGIHE, Aba VIP, Itara Productions, BTN, ATV, Royal FM, Capital FM na Nep Filmz.
English 
Kinyarwanda